नेपाली हास्यव्यङ्ग्य अनलाइन पत्रिका

हामी कुन भाइरससँग बच्नु ?
हामी गरीब देशका नागरिकहरु
दिनहुँ
सडकमा
हजारौं भाइरससँग लडिरहनु पर्छ ।
बेवारिसे भुस्याहा कुकुरको मृतलासबाट
उडेका अरबौं विषाणुहरु
हाम्रो स्वास मार्गलाई राजमार्ग बनाएर
हाम्रो फोक्सोको शहरमा
सुकुम्बासी रुपमा घुसिरहेका हुन्छन्
ढलमतीको कुहेको गन्धसँगै
उडेका लामखुट्टेका सन्तानहरु
सुँडोभरी आतङ्क थोपरेर
हाम्रै रगत डसिरहेका चुसिरहेका हुन्छन्
सडक किनारमा पसारिएका
बासी जिलेबीको छातीभरी
फोहोरी झिंगाहरुको मनोरञ्जन बास छ
महङ्गा रबर टायरले उछिट्याएको
धूलोको साम्राज्यभित्र
हाम्रो नाङ्गो छाती र स्वाभिमानको निश्वास छ
हामी कुन भाइरससँग बच्नु ?
भन्नेहरु त भन्दैछन् चोक बजारमा
उता धनी देशहरुबाट महामारीको लहर आइरहन्छ रे
हरेक पल्टको म्युटेसनले हामीलाई नै सताइरहन्छ रे
भत्किंदैछन् स्कूलहरु
चुँडाईंदैछन् रोजगारीका पुलहरु
गरीब अझै गरीब बन्दैछ
धनी अझै कमाउँने बहानाको सडक खन्दैछ
अँगेनामा अभाव छ
चुलामा भोक छ
हामी कुन भाइरससँग लड्नु ?
महँगीले थिलथिलो पारेको
नुनतेलको अत्यासलाग्दो अभावसँग
हामी हरेक दिन लडिरहेछौं
दुषित र दूर्घन्धित पर्यावरणमा
हामी हरेक दिन सडिरहेछौं
तिनीहरु जस्तो नाम दिने सामर्थ्य नभएका
हामी कुन भाइरससँग बच्नु ?
ठिकै छ
हामी सानु मझेरीको अस्पतालमा
कागतीको चाना निचोरेर
अदुवा र मरिच पानी उमालेर
काँचो बेसार फाँको मारेर
अँगेनामा बसालेको कुच्चिएको कित्लीबाट
काँसको बटुकामा तातोपानी सारेर
पीरो रायोको बीउ पेलेर तैयार
तीखो तेल नाक र चल्नीभरि पारेर
तुलशी पत्ती मिसाएको पानी प्युँदै बाँचौंला
शहर नपसुँला
बारी र खेत गर्दै बसुँला
नत्र त जताततै आतङ्क छ
सिटामोल पनि पाउने सामर्थ्य नभएका
हामी कुन भाइरससँग बच्नु ?

गाैरादह, झापा