नेपाली हास्यव्यङ्ग्य अनलाइन पत्रिका

थियौ चोर जो जो बनेको छ कुर्सी ।
मिलेको छ लोप्पा झरेको छ फुर्ती ।।
गरी काम राम्रो यिमीले चिनायौ ।
थियो सत्यको वाद आफै छिनायौ ।।
१
यहाँ देश सारा बसेको छ रोई ।
भयो जिल्ल आफै खुसीमा छ कोही ।।
फलेको छ नारा हजारौं र लाखौं ।
थियो स्वाद कस्तो सबै आज चाखौ ।।
२
लिची रोप्न खोजे फलेको छ अम्बा ।
पसी राजधानी ढलेको छ खम्बा ।।
कहीँ आँप फल्दै थियो बोट सानो ।
बने देश घाती सबैको अचानो ।।
३
यहाँ स्वार्थ मिल्ने बसे देश बाली ।
कला,धर्म,भाषा सबै यी पखाली ।।
छ कार्पेट रातो पँजेरो र गाडी ।
सही कष्ट कैयौं युवा पस्छ खाडी ।।
४
बने राज छोटे महाराज राजा ।
महङ्गी बढेको भयो देश धाँजा ।।
बिगार्ने तिमी हौ यहाँ नीति सारा ।
पुगे गाउँमा लुक्न ती भातमारा ।।
५
थियो राज कुर्सी बचायौ तिमीले ।
सबै देश बेची पचायौ तिमीले ।।
म गर्दैछु बिन्ती तिमी भाग्य दाता ।
पुजेको छु कुर्सी तिमी हौ बिधाता ।।
६
पाटन- २, सिलंगा, बैतडी
हालः-पहलमानपुर, कैलाली