नेपाली हास्यव्यङ्ग्य अनलाइन पत्रिका

काला सर्प ठुटा दुरुस्त खजुरा लार्भा र बिच्छी सिपी
घोर्ले स्याल हुँडार नाग भुसुना चुस्छन् चुसाहा बिकी
थुप्रै छ्न् चितुवा बसेर घरमा कोठा चहार्ने पसी
नाङ्गा भिल्लहरू मुसा अरिमठे छ्न् बाजका जासुसी ।

साँढे गिद्द गधा अजिङ्गरहरू हाब्रे पँधेरा पनि
गोही हुच्चिल फ्याउरा सलह छ्न् भोका अरिङ्गाल नि
छ्न् लार्भा धमिरा यही मुलुकमा गन्धे छुचुन्द्रा पनि
लोखर्के वनका र बाँदरहरू अर्ना र साँढे अनि ।

छ्न् भ्यात्लुङ् कति हो असङ्ख्य घरमै ढाडे बिराला यहाँ
भुस्याहा मनका कठै कुकुर यी पाइन्छ खोज्दा कहाँ ?
जुम्रा छ्न् मसिना लिखा कति यहाँ ढाडी तथा चम्कना ?
दुम्सी डेडु झिँगा खराब गुणका बढ्ने छ सम्भावना ।

लाम्खुट्टे अनि सिंह भालु थलका उड्ने चमेराहरू
शङ्खेकीट घुँगी अनेक कमिला रोटे र ब्याँगे अरू
छेपारा झुसिले करेट अझ छन् किथ्रा फट्याङ्ग्रा भुरा
किर्ना डम्म भए अझै उडुस यी छ्न् जालमा माकुरा ।

यी मौरी घरका उपेक्षित हुँदा उड्दै प्रवासी भए
सम्झी घार रुँदै रुँदै विकलभै अन्यत्र टाढा गए
रित्तो घार कठै भरिन्छ कसरी मौरी भगाएपछि ?
को बाँच्ला र थुनेर द्वार घरका आगो लगाएपछि ?

दमक- ८, झापा