नेपाली हास्यव्यङ्ग्य अनलाइन पत्रिका

कुरा, थुक्नेहरूको होइन
कुरा, भुक्नेहरूको हो
घोक्नेहरूको कुरा होइन
खोक्नेहरूको कुरा गरेको
ठिकै पढ्नु भो
हो लेखिएको यही हो
थुक्नेले घर मात्र फोहर गर्छ
भुक्नेले सारा मुलुक
घोक्नेले कोठाको ध्वनि प्रदूषण गर्छ
खोक्नेले सर्वत्र प्रदूषण
धेरै भयो अब
खोकीका कर्कस आवाजहरू
अविछिन्न रुपमा प्रवाहित भइरहेका छन्
अचेल खोकी अनेक स्वरूपमा देखिन्छ
धाक रवाफका खोकी
दम्भका खोकी, ज्ञानका खोकी
नादानी र ईष्र्याका खोकी
मालिक रिझाउने खोकी
मुटु बिझाउने खोकी
नक्कली चिन्ता र तेजोवधका खोकी
जब खोकीले सीमा नाघ्छ
उल्टी हुन सुरु गर्छ
बेलैमा ओखतीमूलो गरे
उल्टी रोकिन सक्थ्यो
केही बेर भए पनि
अस्थायी शान्तिको आभास मिल्थ्यो
तर
पुनः खोकी दोहोरियो भने
बिस्फोट हुन सक्छ,
त्यसैले
चिन्ता लाग्छ
कुनै दिन
उल्टी रोक्ने औषधिको अभाव भयो भने ?
मान्छेहरूले भन्ने छन्
केही साल अघिसम्म
यहाँ राजनीति मार्फत
देशको शासन चल्थ्यो ।

कालिका ६, चितवन