नेपाली हास्यव्यङ्ग्य अनलाइन पत्रिका

बेइमानलाई बेइमान नै छ भन्ने
चोर, डाँका, फटाहाहरूको खेदो खन्ने
चाकरी र चाप्लुसी गर्न पटक्कै नजान्ने
कसरी बाँच्यौ ? हाम्रो भैरव ।

जयभोलिमा जोडिएको हाम्रो नाता
अँहँ कसैले तोड्ला जस्तो छैन,
कसैलाई चाहिँदैन आजभोलि इमानदारिता
अरुको कुरा काट्ने र खुट्टा तान्ने,
मात्र आफ्नो लागि बाँच्ने,
नेपालीको राष्ट्रिय विशेषता
तिमीले त्यतिवेला चिनेर पनि
फरक बाटो कसरी हिँड्यौ ?
सक्कली – भैरव ।

मान्छेको आयु बढाउन,
मान्छेकै बली दिन्छन् अझै यहाँ
अकालमा मृत्यु बोलाएर
सत्यलाई टुहुरो बनाउने,
तिम्रो अतुलनिय लेखनशीपले
असत्यको घाउमा नूनचुक खन्याउने,
तिम्रै संझनामा बाँचिरहेछु,
जिउनुका पीडा लुकाएर, हाँसिरहेछु ।

आज मात्र होइन भैरव
तिमीलाई जीवनभरि संझिरहनेछौ
आश्थाले शीर निहुर्‍याइरहनेछौँ ।
आफू सकिएर पनि
युगौँयुग अरुलाई हसाउँने
तिम्रो कलालाई सम्मान छ ।
हृदयभरीको श्रद्धासुमन ।

०००
स्याङ्जा