नेपाली हास्यव्यङ्ग्य अनलाइन पत्रिका

जो आयो ‘मै ठुलो’ भन्छन् को हुन् को हुन् ठुला पनि !
‘म खुबै खँदिलो’ भन्छन् खोक्रिएका मुला पनि !

देश बिग्र्‍यो हदैसम्मन् अकर्मण्य बनी बनी
कल्ले हो यो बिगारेको ? ‘मैले’ भन्दैन क्वै पनि

सत्तामा दशकौँ बस्ने देश पुग्ने रसातल
‘निक्कै राम्रो गरेँ’ भन्ने यस्ता निर्लज्ज निर्वल

उसैले ‘म ठुलो’ भन्छ, बिनाकाम ठुलो बनी !
‘म खुबै रसिलो’ भन्छ हाडिएको मुलो पनि

केकेका मातले टेक्ने खुट्टा नै छाडिए पनि
नमस्ते खान चाहन्छन् नालीमै गाडिए पनि

जो आयो ‘मै ठुलो’ भन्छन् को हुन् को हुन् ठुला पनि !
‘म खुबै खँदिलो’ भन्छन् खोक्रिएका मुला पनि !

०००
काठमाडौं