मित्रलाल पंज्ञानीसद्दे को ?
भिन्नता क्यै देखिँदैन मै हुँ भन्छन् खाँटी, किन यिन्ले बनाएका भिन्नाभिन्नै पार्टी ? हाँगा भिन्नै भए पनि त्यै बुटाको फेद ,सद्दे को हो छैन भने चरित्रमा भेद ?
यस्का घर भाँडा माझ्ने कङ्गालका बच्चा
यल्ले ठान्छ आफूलाई क्रान्तिकारी सच्चा
त्यल्ले पनि त्यस्तै गर्छ मज्जा लिने दाऊ
सोझा मान्छे अभेदको भेद हेर्न आऊ
यल्ले पनि विवाहमा दाइजो माग्छ धेरै
त्यल्ले ठान्छ धेरै दाइजो हुनुपर्छ मेरै
बराबरी यी दुवैको झिलिमिली चर्को
के गरेर छुट्याउने यौटाबाट अर्को
यल्ले पनि मेरो भत्ता बढ्नै पर्छ भन्छ
सांसदले पजेरो त चढ्नै पर्छ भन्छ
दाम् राखेर ढुङ्गालाई ढोग्छ यल्ले पनि
विलासको जिन्दगानी भोग्छ यल्ले पनि
तिनै धोका तिनै जाल तिनै आनीबानी
तिनै माछा तिनै माझी त्यै धमिलो पानी
यो दल कि त्यो दलको कुरा निकालेर
झगडामा वर्षौं बित्यो बैँस गयो खेर
भिन्नता क्यै देखिँदैन मै हुँ भन्छन् खाँटी
किन यिन्ले बनाएका भिन्नाभिन्नै पार्टी
हाँगा भिन्नै भए पनि त्यै बुटाको फेद
सद्दे को हो छैन भने चरित्रमा भेद ?
०००
काठमाडौं
Subscribe
Login
0 Comments
Oldest
