नेपाली हास्यव्यङ्ग्य अनलाइन पत्रिका

म पनि शहीद भएको छु रे राजपत्रमा
गाउँलेले भनेको मैले सुनेको
हो म जिउँदै ज्यान छँदै आलै अवस्थामा
सरकारको प्रिय शहीदको सूचीमा
सुची गरिरहेको अवस्थाको सूचीकृत
शहीद हुँ अरे अरुले भनेको सुनेको ।

मैले मेरी आमालाई धन्य ठानेको छु
किनकि मलाई मेरो मृत्यु नभैकन शहीद बनाउन
आमाले कैयौँ कष्ट सहेर जन्माउनु भयो
हुर्काउनु भयो र बढाउनु भयो ।

आन्दोलनमा जान नदिई स्कूल कलेज पढाउनु भयो
त्यसैले म आज गाउँले र सरकारको राजपत्रमा
गिद्धेदृष्टिमा जिउँदै शहीद भएको छु ।
मुलुकमा भएको स्वार्थी आन्दोलनको
आसम्म नबुझ्ने र शहीदको शसम्म
उच्चारण गर्न नसक्ने म आज शहीदको
सूचीमा बसेर समूहमा टोलाई रहेको छु ।

भनौँ म शहीद शब्दले तर्सिएको छु
शहीदको शालिक देख्दा आफूलाई सम्झन्छु
र म आफैँलाई मरिसकेको शहीद ठान्छु
सधैँ चराहरूको विष्टीले नुहाउँछु र ढाकिन्छु ।

नेताहरूको भाषणमा सधैँ प्रिय शब्दका रूपमा
माझिन्छु, पखालिन्छु वर्षा हावा हुरी झरीमा
ओत लगाउन चरा आउँछ र मेरो शिरमा
प्रसाद छाडेर जान्छ प्रत्येक साँझ बिहान ।

हो म यो मुलुक कै भाग्यमानी शहीद
मरेपछि पाउने शहीदको सम्मान मैले
जिउँदै पाएको छु मेरो नाममा मैले नै
राहत पाएको छु, भोज खाएको छु ।

अहिले मलाई शहीद भनेर चिन्छन्
सबैले मलाई यो शहीद मर्‍यो भने
अर्को जिउँदो शहीद जन्मदैन भन्छन्
जुन मेरोलागि पीडाको विषय बनेको छ ।

प्रगतिवादको विकल्पका रूपमा म आफैले
आफैलाई यतिबेला वीर शहीद भन्न बाध्य भएको छु
जब कि मैले आन्दोलन देख्न पाइन
कतै कुनै आन्दोलनमा सहभागी हुन पाइन ।

धन्य छ सरकार म आन्दोलनको आ नबुझ्ने मान्छेलाई
स शरीर शहीद घोषणा गरेर आन्दोलनको बीऊ रोप्न
मलिलो खेतबारी खोजी गर्दै हिंड्न बाध्य पारिएको छ ।

०००
गाईघाट, उदयपुर