नेपाली हास्यव्यङ्ग्य अनलाइन पत्रिका

नाङ्गो बन्छ सधैँ यहाँ सदन यो नाङ्गै सबै सांसद ।
नाङ्गो देश अझै; सधैँ छ रमिता नाङ्गै भए वास्तव ।
बोली-काम कता; विचार कसको; नेतृत्व सत्ता कुन ?
छक्कै; व्यर्थ बनूँ यहाँ म किन खै ! नाङ्गो रह्यो कानुन ।१।

गर्छन् भेद सधैँ समान छ कहाँ; स्वार्थी छ सत्ता जब ।
मौका हेर्छ अनेक दाउ उसको खोक्रो बनायो सब ।
कल्ले गर्छ विरोध; सोच छ उही; मान्दैन जो सज्जन-
थोरै छन् प्रतिकार गर्न उनको; पुग्दैन बोली जन ! ।२।

खोज्दै न्याय यहाँ हरेकपलमा; निर्दोषनै मर्दछन् ।
कल्ले बुझ्छ र निष्कलङ्क जनको; बल्छी तिनै पर्दछन् ।
कस्तो यो सरकार राज्य कसको; सेवा कहाँ गर्दछन्
चल्छन् नाटकझैँ सधैँ सदनमा; धम्की अझै भर्दछन् ।३।

बाधा छन् मजदूरमा; कृषकमा या बन्द व्यापारमा ।
विद्यार्थी;महिला; विदेशतिरमा; बन्दी बनेका जहाँ ।
छैनन् न्याय कतै; छ कानुन कहाँ ! उर्लिन्छ पीडा जब ।
नेपाली जनता अभाव दुखमा आक्रान्त छन् वास्तव ।४।

पापी व्यक्ति पुगे बसे सदनमा; के बन्छ खै कानुन !
निर्दोषी जति यी रहे सकसमा; उन्मुक्ति झन् दुर्जन ।
थोरै सांसदले बुझेर दुनियाँ; सत्यार्थ जो बोल्दछन्
सुन्दैनन् तब यी ठुला दल यहाँ; सत्कर्म जो पोल्दछन् ।५।

काण्डै काण्ड भए अनेक थरिका संलग्न नेताहरू ।
साक्षी बस्छ कुरेर आज दुधको ढाडे बिरालो बरु ।
नेता छन् भरिया दलाल परका हुन् खेतला यी सब !
हामी मूर्ख भयौँ अनर्थ गरियो के आस राखौँ तब ।६।

केही व्यक्ति म देख्छु जो सदनमा बोल्दै छ साँचो तर ।
बोली प्रष्ट; विचार राष्ट्रहितमा; छन् आसलाग्दा वर ।
बाँकी छन् खलझैँ लठैत भरका खै आज लज्जा डर !
यस्ताबाट रहन्न राष्ट्र गरिमा; आगो लगाए घर ।७।

०००
२०८०/१/२६
भरतपुर, चितवन ।