नेपाली हास्यव्यङ्ग्य अनलाइन पत्रिका

बाद्यताले सहर आका केहि सुकुम्बासी
पछि हुलमा मिसिएका अन्य हुकुम्वासी

मिसिनेले पार्टी-आडमा चोला फेर्दै गए
नेताजनको आशिर्वादमा मै हुँ भन्ने भए

बलमिचाइले तिनै मान्छे ठुलाघरे भए
सोझा सुकुम्बासी भने अलपत्रै रहे

अतिक्रमण पेशा बन्यो जवर्जस्ती माझ
नयाँनयाँ थलो मिचे नमानेर लाज

पहुँच आडमा अघि सरे पर्ती गह्रा तास्न
हुँदाहुँदा आँट बढ्यो सम्पदा नै मास्न

गुठी जग्गा हत्याउने बन्यो तिनको तारो
पार्टी पोषित अतिक्रमण हटाउन भो गाह्रो

कहिले गर्ला राजनीतिले यी समस्या हल ?
कहिले पाखा लगाउला हुकुम्वासी छल ? ॥

०००
अमेरिका