नेपाली हास्यव्यङ्ग्य अनलाइन पत्रिका

डिल्लीप्रसाद मूलतिहुन

अचम्म लाग्छ हेटौंडा बन्ने इच्छा गर्‍यो मियो
पुरै देश समेटेर हाँस्यो बुरुक्क उफ्रियो
होचोमा बस्छ यो फेरि टाकुरोमा चढ्यो तर
यसरी अग्लिंदै माथि जान मिल्दैन मिल्छ र ?

यो आफै राजधानीको राजधानी भयो किन ?
बन्नुपर्ने नराम्रो हो राम्रो बन्दै गयो किन ?
पाहुना घरमा डाक्छ उच्च सम्मान गर्छ यो
गयो भने यसो गर्दै पक्कै खाडल पर्छ यो

खित्का छोडेर मान्छेका सामु हाँसो जगाउँछ
बाङ्गो लौरो उचालेर भ्रष्टलाई ठटाउँछ
बुढ्यौलीका कुरा सुन्न साह्रै धेर रुचाउँछ
बन्द हुन् यसका कान जस्तो लागेर आउँछ

असत्य नक्कली राम्रो हुन्छ भन्ने कुरा भुली
सत्य बाटो अँगालेर किन चढ्नु पर्‍यो चुली
साहित्यको भलो गर्छु भन्ने मान्छे रुचाउँछ
यो पाराले कताबाट उज्यालो दिन आउँछ ?

हेटौंडाको निको चाल देखिएन कतै पनि
खुट्टा तान्नेहरू आऊ चुडाऊ तान कन्दनी
बाङ्गाटिङ्गा सबै जागौँ हेटौंडा तह लाउन
बेलैमा नसके तान्न पर्नेछ पछुताउन

गर्नुपर्ने थियोे अल्छी जाँगरिलो भयो किन ?
हेटौँडा यसरी जाग्दा बेर लाग्दैन भासिन
ठट्टा गर्नेहरूलाई पुरस्कार दिलाउँछ
भ्रष्टभ्रष्ट जुटे बल्ल यसले चाल पाउँछ

गर्दैन यो घुस्याहाको मान सम्मान खै किन ?
भ्रष्टको खन्छ यो खेदो खोज्छ सुन्दर देखिन
चोर दलाल डाकाको सातोपुत्लो उडाउँछ
हेटौंडा पाप गर्दैछ उल्का लागेर आउँछ ।

०००
मोलुङ- ५ ओखलढुङ्गा