देवराज तिवारीकेही ठोक्तकहरू
शासकसँग सधैँभरि अहङ्कारी गुण हुन्छ सत्तामा त जहिले पनि अत्याचारी गुण हुन्छ मजासँग टिक्छन् डगमग गर्ने कुर्सीहरू पनि जब सत्ता छेउमा धुपौरेको बफादारी गुण हुन्छ ।
देवराज तिवारी
१.
तेल घोप्ट्याएपछि दियोका रूपमा जल्न जानु छ
तर्कका बलमा एकैछिन दुनियाँलाई छल्न जानु छ
म त ठुलै अभियन्ता पो हुँ चुप लागेर बस्न सक्दिनँ
आफूलाई उस्तै राखेर पनि समाज बदल्न जानु छ ।
२.
उहाँले त एउटा मदारी जस्तै भएर देश चलाउनुहुन्छ
गमला भिजाउने हजारी जस्तै भएर देश चलाउनुहुन्छ
थुप्रै फाँटहरू खाली छन् देशभरि त हरिया बगैँचा उमार्ने
कोसी तीरको बालुवाबारी जस्तै भएर देश चलाउनुहुन्छ ।
३.
अचेल महलमा बसेपछि भन्छन् कुकुरदेखि होसियार
गेटमा सिक्री कसेपछि भन्छन् कुकुरदेखि होसियार
बाहिर हुँदा मानिस भएर डुलेझैँ लाग्दथ्यो उनलाई त
लौ न घरभित्र पसेपछि भन्छन् कुकुरदेखि होसियार ।
४.
तिनीहरू लुट्नमै मस्त छन् जो तागत बटुलेर बसेका छन्
गुट उपगुटमै व्यस्त छन् जो तागत बटुलेर बसेका छन्
आफ्नै तालका डम्फू बजाउँछन् मौका मिलिहाल्यो भने
ढुकीढुकी डस्तछन् जो तागत बटुलेर बसेका छन् ।
५.
शासकसँग सधैँभरि अहङ्कारी गुण हुन्छ
सत्तामा त जहिले पनि अत्याचारी गुण हुन्छ
मजासँग टिक्छन् डगमग गर्ने कुर्सीहरू पनि
जब सत्ता छेउमा धुपौरेको बफादारी गुण हुन्छ ।
०००
बुटवल -११, कालिकानगर, रुपन्देही
हाल- हेटौँडा -४, मकवानपुर
मोबाइल नम्बर ९८४५४६०४००
