देवराज तिवारीपाँच थान ठोक्तक
भोगको गति तीब्र चल्ने शक्तिको दौडमा उज्यालो भन्दा बढी शासन रातको खानी रहेछ ।
देवराज तिवारी :
१. चेतना
तेल घोप्ट्याएपछि दियोका रूपमा जल्न जानु छ
तर्कका बलमा एकैछिन दुनियाँलाई छल्न जानु छ
म त ठुलै अभियन्ता पो हुँ चुप लागेर बस्न सक्दिनँ
आफूलाई उस्तै राखेर समाजलाई बदल्न जानु छ ।
२. कमजोरी
तिमी कहिल्यै मानिसको गीत बनेर आएनौ
श्रम र श्रमिकहरूको हित बनेर आएनौ
सदा आफ्नै चिन्तनमा मस्ती मारेर रमायौ
जजसले जिते पनि जित्नुपर्नेको जित बनेर आएनौ ।
३. चाहना
कहिले रात मलाई उपहासजस्तो लाग्छ
एकै रातमा पनि त्यो इतिहासजस्तो लाग्छ
विचारको व्यापार चल्छ मनको अन्योल घरमा
फूल हाँसेपछि पो रात मधुमासजस्तो लाग्छ ।
४. नजर
लुम्बिनीबाट फगत लुम्बिनी देखिन्छ परेवा देखिँदैन
प्रेमिल नगरबाट हराएको त्यो चखेवा देखिँदैन
निक्कै बदलिएको छ, चलन बदलिएको छ
महामारीमा पनि स्वार्थ देखिन्छ सेवा देखिँदैन ।
५ रोग
सत्ता भनेको पनि मातैमातको खानी रहेछ
मनमौजी मात्रै चल्ने जमातको खानी रहेछ
भोगको गति तीब्र चल्ने शक्तिको दौडमा
उज्यालो भन्दा बढी शासन रातको खानी रहेछ ।
०००
२०८०/४/८
हेटौडा
Subscribe
Login
0 Comments
Oldest
