नेपाली हास्यव्यङ्ग्य अनलाइन पत्रिका

देवराज तिवारी :

१.
अचेल महलमा बसेपछि भन्छ कुकुरदेखि होसियार
गेटमा सिक्री कसेपछि भन्छ कुकुरदेखि होसियार
बाहिर हुँदा मानिस भएर डुलेझैँ लाग्दथ्यो उसलाई
लौ घरभित्र पसेपछि भन्छ कुकुरदेखि होसियार ।

२.
लुम्बिनीबाट फगत लुम्बिनी देखिन्छ परेवा देखिँदैन
प्रेमिल नगरबाट हराएको त्यो चखेवा देखिँदैन
निक्कै बदलिएको छ चलन बदलिएको छ
महामारीमा पनि स्वार्थ देखिन्छ सेवा देखिँदैन ।

३.
तिनीहरू लुट्नमै मस्त छन् जो तागत बटुलेर बसे
गुट उपगुटमै व्यस्त छन् जो तागत बटुलेर बसे
आआफ्नै तालका डम्फू बजाउँछन् जब मौका मिल्छ
ढुकी ढुकी डस्तछन् जो तागत बटुलेर बसे ।

४.
जब रात पर्दै जान्छ सहरहरूको तात्ने क्रम शुरु हुन्छ
बैँस उम्लिएपछि उत्ताउलाहरूको मात्ने क्रम शुरु हुन्छ
हेर्नुस् छरपस्ट यौवनका रहरहरू पोखिइसकेपछि
गाउँदै भजन धर्मको बत्ती कात्ने क्रम शुरु हुन्छ ।

५.
हेर्नुस् त उन्नाइसबाट बिस भएर आएका छन्
अनेक ताना बुन्न खप्पिस भएर आएका छन्
गणतन्त्रको दुर्गन्ध वहन्छ अचेल किन देशमा
लाग्दै छ ती पञ्चराणाको वारिस भएर आएका छन् ।

०००
रुपन्देही, हाल हेटौंडा