माथि पुग्नुस्
सबै कुरा जायज भयो शक्तिको खेल खेल्दा कसैलाई अरू नसके नि पाउ धुने क्षमता देखाएर माथि पुग्नुस् ।
देवराज तिवारी :
कि गोरु पनि दुहुने क्षमता देखाएर माथि पुग्नुस्
कि पिँधबाटै चुहुने क्षमता देखाएर माथि पुग्नुस्
अस्वस्थ दिमागमा स्वस्थ बच्चा किन खोज्नुहुन्छ
नकुर्नुस् नौ महिना तुहुने क्षमता देखाएर माथि पुग्नुस्
चौडा छाती र उठेको शिरमा रमाएर के गर्नुहुन्छ
धनुष जस्तै नुहुने क्षमता देखाएर माथि पुग्नुस्
राष्ट्रिय स्वाभिमानका चर्का कुरा हात्तीका दाँतजस्तै हुन्
बरु त्यो आलु जस्तै कुहुने क्षमता देखाएर माथि पुग्नुस्
सबै कुरा जायज भयो शक्तिको खेल खेल्दा कसैलाई
अरू नसके नि पाउ धुने क्षमता देखाएर माथि पुग्नुस् ।
०००
स्थायी घर बुटवल ११, कालिकानगर– रुपन्देही
हाल कार्यरत हेटौँडा–४, मकवानपुर