नेपाली हास्यव्यङ्ग्य अनलाइन पत्रिका

देवीप्रसाद मिश्र :

सोपान चड्न पाएमा मान्छे नित्य रमाउँछ ।
सत्यलाई पछारेर असत्य गीत गाउँछ ॥
लोक संस्कार छाडेर चाहना छ समुन्नति ।
खिचडीझैँ भयो हाम्रो सारा जीवन पद्धति ॥

ठुला माछा रमाएका जहिल्यै छन् तलाउमा ।
भुरा समस्त अल्झिन्छन् चारो देखेर जालमा ॥
धर्मराज हुँदा अन्धा मैलिँयो न्यायको गति ।
खिचडीझैँ भयो हाम्रो सारा जीवन पद्धति ॥

शकुनि छल बोकेर नगरी कान्तिपुरमा
भाइबन्धु लडाएर हिँडेका छन् तमाममा
द्रोणाचार्य त्यतै लाग्छन् देखिएन सफा मति
खिचडीझैँ भयो हाम्रो सारा जीवन पद्धति ॥

चीत्कार द्रौपदी गर्दा समाज मूकदर्शक ।
कसरी हात पार्ने हो भन्छन् पाण्डवले हक ॥
ठानेको कृष्णको रूप दुर्योधन हुँदा मति ।
खिचडीझैँ भयो हाम्रो सारा जीवन पद्धति ॥

भित्र भित्र मडारिन्छन् धृतराष्ट निरन्तर ।
गान्धारीका प्रतिज्ञाले कुनै अड्चन रोक्छ र ?
देखेको तथ्य बोल्दैनन् गयो सञ्जयको गति ।
खिचडीझैँ भयो हाम्रो सारा जीवन पद्धति ॥

चक्रव्यूह रचेका छन् अभिमन्यू फँसाउन ।
खिन्नता छ यता हेर्दा उत्तराको सदा मन ।
रोक्दैनन् भीष्मले केही आफन्तकाे अधोगति
खिचडीझैँ भयो हाम्रो सारा जीवन पद्धति ॥

०००
२०८०/५/१६