बिन्दु दहाल ‘मूकदर्शक’गाह्रो छ नेता हुन
जाबी थाप्न हिँडूँ कठै म कसरी निर्दोष मान्छे चरा पासो पार्न सके म हाँस्नु कसरी रुन्नन् र आमा धरा ? आफ्नै नाक मुहारमा रहरले को दल्छ कालो कुन ? नेता बन्न ठुलो भयो मनसुवा गाह्रो छ नेता हुन ।
बिन्दु दहाल मूकदर्शक :
चोर्ने आदत छैन साधु परियो ढाँट्ने न बानी छ यो
भ्रष्टाचार म गर्न जान्दिनँ कुनै साह्रै नमज्जा भयो
कालो देख्छु सफेद भन्नु कसरी तम्सिन्छु मैलो धुन
नेता बन्न सकिन्न झैँ अब भयो गाह्रो छ नेता हुन ।
ल्याए स्वणर् विमानमा म कसरी चाँदी भनूँ हे हरि
हेर्दा देख्छु म प्रष्ट त्यो सय किलो साठी भनूँ के गरी
कन्या राशि म हुन्न भन्छ मनले मर्दैन मान्छे कुन ?
नेता बन्न ठुलो भयो मनसुवा गाह्रो छ नेता हुन ।
जाबी थाप्न हिँडूँ कठै म कसरी निर्दोष मान्छे चरा
पासो पार्न सके म हाँस्नु कसरी रुन्नन् र आमा धरा ?
आफ्नै नाक मुहारमा रहरले को दल्छ कालो कुन ?
नेता बन्न ठुलो भयो मनसुवा गाह्रो छ नेता हुन ।
अल्छे धूर्त बनी उघूँ सदनमा मान्दैन मेरो मन
सीमासाँध मिचे म चुप्प कसरी रोकी बसूँ धड्कन
आफ्नो राष्ट्र जलाउँदै हृदयले नीरो हुने हो सुन
नेता बन्न ठुलो भयो मनसुवा गाह्रो छ नेता हुन ।
मर्कीको उपचार गर्न कसरी जाऊँ म सिङ्गापुर ?
पारी ध्वस्त सिसी फुटेज कसरी ढाटूँ बनूँ आसुर
बेची नित्य युवा विदेश यसरी सक्ला र को अग्लिन ?
नेता बन्न ठुलो भयो मनसुवा गाह्रो छ नेता हुन ।
०००
दमक, झापा ।
Subscribe
Login
0 Comments
Oldest
