नेपाली हास्यव्यङ्ग्य अनलाइन पत्रिका

गोपाल काफ्ले :

“चट्ट बनेर हिँड्
काँडाकाँडी गिँड्
बाधा आए भने
आँखा नहेरी भिड् !”

“महङ्गा लुगा लगा
बाहिरबाट मगा
मरेर के लानु छ
जिउँदैमा अघा !”

“सम्पत्ति टन्न कमा
अरुको अगाडि जमा
पैसाको बोटमा पुग्ने
एउटा मूलबाटो समा !”

“खा – पी मोज गर्
दिनदिनै भोज गर्
एक बारको जुनी
नयाँ-नयाँ खोज गर् !”

“दिमाग घुमा
मनलाई झुमा
नयाँ टेस्ट गर्
जे गर्छस् बेस्ट गर् !”

भित्रको म त्यसो भन्छ
बाहिरको म यसो भन्छ :

“इज्जतको ख्याल राख्
अर्काको पुरा नचाख्
तँ यस्तो – उस्तो भन्ने
भोलिलाई बाटो नराख् !”

“इमान बचा
इच्छा पचा !
भोगी दुनियाँमा
अब्बल जचा !”

“संस्कार र धर्म नछोड्
संस्कृति र कर्म नतोड्
प्रेरणा बन् अर्काको
फूल छोडेर काँडा नगोड् !”

“दुई मको कुस्ती
दिइरहन्छन् सास्ती
दुवैका कुरा सुनेर म
लिइरहन्छु मस्ती !”

०००
हेटौंडा