शम्भु गजुरेलनेता कहाँ हुन्छ र…
औठा छाप रहोस् तथापि गफमा विद्वान् बनोस् तापनि होच्याओस् गुरु वा गुणी जन सबै बेकारका हुन् भनी चाहे ऊ सुदखोर होस् पतित होस् होस् पातकी ऊ तर भ्रष्टाचार कुनै गरेनछ भने नेता कहाँ हुन्छ र !
शम्भु गजुरेल :
दौरा वा सुरुवाल कोट शिरमा ढाका लगाए पनि 
चिल्ला भाषणले विशाल चुचुरा सम्मै बनाए पनि
तारा चन्द्र सबै टिपेर म यहाँ झार्नेछु भन्ला तर
हत्यामा यदि हात रैनछ भने नेता कहाँ हुन्छ र !
नारी मुक्ति निमित्त तत्पर सदा देवी भनी पुज्दछ
स्वास्नी एक तथा अनेक गणिका प्यारी भनी राख्दछ
नारी इज्जतको निलाम घरमा जाला सधैँ ऊ तर
मुद्दामा करणी रहेनछ भने नेता कहाँ हुन्छ र !
टीका चन्दनको र राम मुखमा रुद्राक्ष होस् हातमा
घण्टा शंखसँगै पवित्र महिमा भज्दै गरोस् साथमा
अग्लो मन्दिरको सहर्ष उसले निर्माण गर्ला तर
द्यौता तस्कर ऊ रहेनछ भने नेता कहाँ हुन्छ र !
औठा छाप रहोस् तथापि गफमा विद्वान् बनोस् तापनि
होच्याओस् गुरु वा गुणी जन सबै बेकारका हुन् भनी
चाहे ऊ सुदखोर होस् पतित होस् होस् पातकी ऊ तर
भ्रष्टाचार कुनै गरेनछ भने नेता कहाँ हुन्छ र !
नारा लाउनका निमित्त सँगमा राखेर गुण्डा दल
सच्चा राष्ट्रियता भनेर रणको देला चुनौती खल
होलान् भक्त हजार लाख तलुवा चाट्ने नशेडी तर
खोला बेच्न कुनै छुटाउँछ भने नेता कहाँ हुन्छ र !
०००
नुवाकोट, हाल – काठमाडौं
Subscribe
Login
0 Comments
Oldest
