नेपाली हास्यव्यङ्ग्य अनलाइन पत्रिका

हाेम सुवेदी :

ए कोही छ कि
मेरो कविता कम्लाउन लागेको छ
कविता ब्याएपछि
सुत्केरी सह्यार्ने
धन्दे चाहिएको छ
थाङ्ना धोइदिने
गन्धे चाहिएको छ ।
सेकताप गरिदिने
यता सारिदिने
उता सरिदिने
चाँडै निको पारिदिने
गीत सुनाइदिने
भाडामा कविता गाइदिने
सुत्केरी झोल उमालिदिने
घाँस हालिदिने
जिउ पखालिदिने
कविताको रेखदेख गर्ने
सेकताप गर्ने
कोही छ कि
त्यस्तो चाहिएको छ ।
कसैलाई हरिया नोटको खाँचो छ
कुरा यो साँचो छ
कविताको कम्लाएको फाँचो छ
धाई चाहिएको छ
माई चाहिएको छ
निवेदन मागिएको छ
कामको हकमा
कवितालाई सुताइदिने
कवितालाई मुताइदिने
कवितालाई फेटा गुताइदिने
कान कोट्याइदिने
लँगौटी फेराइदिने
ललौरी गाइदिने
लाम्टा चुसाइदिने
धाईको खाँचो छ ।
कविताका जुम्रा पर्लान्
ठुङ मारिदिनेको खाँचो छ
कवितामा झार उम्रेलान्
गोडिदिने जनको खाँचो छ
कविता ब्याउन ब्याउन लागेको छ
निकै कम्लाकएको फाँचो छ
कविताको बिगौती दुहुने
गोठालाको खाँचो छ
कविता निकै कम्लाएको छ
भरिएको फाँचो छ
कवितालाई थल्लिने बेथा लाग्ला
स्टेचरमा अस्पताल लानु पर्ला
यसैले
भरियाको खाँचो छ
कविता ब्याएपछि
तेल घसिदिने
राल सिँगान पुछिदिने
थाङ्ना धोइदिने
सुसारेको खाँचो छ
कविताको कपालमा
जुम्रा पर्लान्
ठुङ मारिदिने
लिखा झारिदिने
ढाडी मारिदिने
चम्कना टिपिदिने
अलिक आँखा देख्नेको खाँचो छ
कविता कम्लाएको छ
भरिएको फाँचो छ
पुरुषले काम चल्दैन
स्त्रीकै खाँचो छ
चाँडै बियाउने पक्का छ
किनभने भरिएको फाँचो छ
हुन त भरिया जतासुकै पाइन्छन्
कविता गाइदिने
सुताइदिने उठाइदिने
स्त्री नै चाहिन्छन्
कविता जोडिदिने
कविता गोडिदिने
कविता तोडिदिने
कविता फोडिदिने
कविताका लिखा टिपिदिने
कवितालाई नुहाइदिने
कविता सुताइदिने
कविताका बच्चालाई चुसाइदिने
धाई चाहिएको छ
अर्जेन्ट छ
कवितालाई एउटा
माई चाहिएको छ
कविताको ललौरी गाइदिने
राम्रो गरी गाएर सुनाइदिने
हरिया नोट दिने कुरा साँचो छ
कविताको राल सिँगान पुछिदिने
भरियाको खाँचो छ
धाईको खाँचो छ
माईको खाँचो छ ।

०००
भद्रपुर, झापा