राजेन्द्रप्रसाद अधिकारीसामन्त र शकुनिको पासा
दियोको बत्तीसँग पुतली झुम्मिएझैँ सामन्त पासामै झुम्मिरहन्छ; अमूल्य जीवन र ऐतिहासिक क्षणको बोध गर्न पनि ऊ सकिरहेको हुँदैन। मात्र शकुनिका आँखामा आफ्नो अस्तित्वको ऐना हेर्छ ।
राजेन्द्रप्रसाद अधिकारी :
कुनै यस्तो देश छ
जहाँ सरकार छ
सरकार चलाउने पार्टी छ
पार्टीभित्र शीर्ष सामन्त, र
सरकार चलाउने शकुनिहरू छन् ।
देशभर विदुरहरू
विचारसहित छटपटिएका छन्
शकुनि पासा बोकेर
सामन्तलाई जुवाको दाउमा लगाइरहेको छ,
सत्ता र सामन्तको अगाडि
टिक्दैनन् विदुर र विचारहरू
टिक्छन् केवल शकुनि र पासाहरू ।
जलोस्
देश जलेर फरक पर्दैन सामन्तलाई
ऊ जुवा खेलेरै काल जित्ने
परिकल्पनामा मस्त हुन्छ,
शकुनि र पासाको अगाडि
सामन्त खरानीलाई नै सम्पत्ति देख्छ, र
आह्लादित भइरहेको हुन्छ ।
सामन्त मात्र जीवन देख्छ
मृत्युको आभास समेत हुँदैन उसलाई;
सत्ता र शक्तिको मातमा
विजय मात्र देख्छ
हारको अन्दाजसम्म हुँदैन उसलाई,
शकुनिले ओछ्याएको थर्की र
थर्कीमाथि फालिएको पासामा
विदुरहरू कहिल्यै जित देख्दैनन्
त्यसैले शकुनि र सामन्तसँग
विदुर र विज्ञानलाई मिलाउनै सकिँदैन ।
दियोको बत्तीसँग पुतली झुम्मिएझैँ
सामन्त पासामै झुम्मिरहन्छ;
अमूल्य जीवन र ऐतिहासिक क्षणको
बोध गर्न पनि ऊ सकिरहेको हुँदैन,
मात्र शकुनिका आँखामा
आफ्नो अस्तित्वको ऐना हेर्छ,
गमक्क फुल्छ, र
पासासँगै सामन्त
आफ्नो अमूल्य समयलाई
थर्कीमा निरर्थक बारम्बार फालिरहन्छ,
र निरन्तर हारिरहन्छ ।
०००
आजको आकाश (२०७९)
