नेपाली हास्यव्यङ्ग्य अनलाइन पत्रिका

केशव सिल्वाल :

केही मानिस अझैँ पनि
दुई खुट्टा टेकेर उभिएका छन्
हातले चोरऔँला तेर्स्याइरहेका छन्
निधारमा क्रोध खुम्च्याइरहेका छन्

हत्या हुन बाँकी केही मानिस
आँखामा हत्याको
क्यालेण्डर झुण्ड्याएर हेरिरहेका छन्

खण्डहर संरचनाको बीचमा
भत्कन बाँकी संरचना
त्यो दिन कुरिरहेका छन्

मानिसले कुल्चिएको जमिनमा
केही मात्र बाँकी छ
राष्ट्रिय अस्मिताको ढुकढुकी

जरादेखि सुकिसकेको छ
मानिसको खैरो आशा
दुःखी मानिस गाइरहेका छन्
अझै पनि दुःखको गीत

तारो बनिरहेका छन्
बाँकी रहेका केही उज्याला
मानिसको झीनू चेतना
र अङ्कुराइरहेको फूलको मसिनो बिरुवा

फुक्लिसक्यो धेरै
तर फुकाल्न बाँकी नै छ
अझै पनि केही लुगा

अझै बाँकी छन् केही कुराहरू
ध्वंसको लागि ।

०००
वर्जित अवशेष (२०६३)