नेपाली हास्यव्यङ्ग्य अनलाइन पत्रिका

रमेश खकुरेल :

भनूँ खास इच्छा त केही थिएन
यसै बस्नलाई मनैले दिएन
बसे मौन आफै म पापी हुनेछु
भनेदेखि विश्वासघाती हुनेछु ।।

म पापी बनूँ वा कि विश्वासघाती
दुवै हालमा दोष होला ममाथि
सहूँ के गरी पोल्न थाल्दैछ छाति
गरें फैसला बन्न विश्वासघाती ।।

तिमी मित्र हौ बिर्सिएको त छैन
निकै भार तिम्रो तिरेको त छैन
तिमी नै बन्यौ दुष्ट बिर्सी सकिन्न
लगी बेच आमा यसै बेच्न दिन्न ।।

यताबाट सारी कसैले लुछेछन्
उतापट्टि चोली कुनै तान्न खोज्छन्
तिमी साथ लागेर हाँ जी भनेर
उतै ढोग्दछौ पाउमा ज्यू गरेर ।।

मिठो भेटिंदैमा जुठो खान जान्छौ
लुठो सामु आए झुकी बोक्न जान्छौ
जुठो हाडमा लोभले टोक्न जान्छौ
पिठोनिम्ति सम्मान नै बेचिदिन्छौ ।।

टुट्यो आज नाता भयो दूर जाऊ
मलाई तिमी भाइ भन्दै नआऊ
गरें घोषणा हैन तिम्रो म भाइ
नठान्नू तिमी फेरि आफ्नो मलाई ।।

०००
काठमाडाैं