नेपाली हास्यव्यङ्ग्य अनलाइन पत्रिका

वासुदेव शर्मा लुइँटेल :

ए मान्छे !
सत्तोसराप गर्नेलाई
शत्रु भनेर
तेले चिनेको छस्
हो।
तर-
हजूरै हजुरको गजुर लाउने
तेरो पुजारी बनिटोपलेको
धूर्त पाखण्डीको पनि पारख गर
ए मान्छे !
तारीफै – तारीफको मात्र भर नपर ।

ए मान्छे !
नेतागिरीको नौनी दलिएको
तेराे तालुमा
आलु फल्नुभन्दा पहिले नै
ती खस्रा पाइला टेकिएको दिन
तैँले बलि बन्नुपर्नेछ, बलि !

ए मान्छे !
मान्छे चिनेर
मान्छे सुहाउँदो व्यवहार गर
जमीनमा बसेर
आकाशको भर नपर ।

ए मान्छे !
तैँले आफूलाई जे सम्झेको छस्
अरूले त्यही सम्झेका छैनन्
अर्कै सम्झेका छन् – अर्कै !
तँ आफूलाई प्रलयङ्कारी महादेव सम्झन्छस् भने
तेरी स्वास्नी तेरै छातीमा टेकेर
अट्टहास गर्दैछे भन्ने पनि नबिर्सी
पत्यार नलागे –
हनुमान ढोकाको नाम नमिलेको
कालाभैरव भनिनेलाई हेर ।

ए मान्छे !
सलाम, स्वस्ति, नमस्कारको मात्र भर नपर ।

०००
[‘भालुपुराण’ बाट ]
‘छ्याकन’ (२०३३)