नेपाली हास्यव्यङ्ग्य अनलाइन पत्रिका

जयदेव गोविन्द :

तिमी तँ ऊ त्यो भुसुना समान
उनी तपाईं पथका घुसान
अरू कसैको स्तर देखिँदैन
कोही मजस्तो गुणयुक्त छैन ।०१

राम्रो म मेरो छ महान् चरित्र
छ विश्व आफ्नै परिवेशभित्र
स्वयं स्वयं घोषित देवता म
पुज्छन् सबै जान्छु जता जता म ।०२

एक्लो ममा उन्नत विज्ञता छ
आवाजमा गुञ्जित नम्रता छ
म मात्र यस्तो दिलदार पात्र
अरू सबै पूरक वस्तु मात्र ।०३

म सर्वदा पूजित राजनेता
ब्रह्माण्डदर्शी युगको विजेता
अजेय मैले रण टार्नु छैन
त्यो मृत्यु आए पनि हार्नु छैन ।०४

त्रिलोकदर्शी म अमोध शक्ति
आई गरून् लोक अनन्त भक्ति
त्रिकाल मेरै जप वन्दना होस्
’म’ मात्रमा उन्नत चेतना होस् ।०५

उत्कृष्टताको पगरी समाऊँ
चातुर्यको धाकसभा चलाऊँ
देवेश ठानून् सबले मलाई
मडारियोस् भित्र दिगो मपाइँ ।०६

जाँदैन मेरो कहिल्यै जवानी
वार्द्धक्यको हुन्न कुनै निशानी
स्वनामको कीर्तन नित्य गाऊँ
‘अहम्-अहम्’को मदमा रमाऊँ ।०७

०००
नुवाकोट