नेपाली हास्यव्यङ्ग्य अनलाइन पत्रिका

जयदेव गोविन्द :

आफ्नो भूमि दुखेर रोइरहँदा छौँ दङ्ग हामी भने
मारी सम्प्रभुता स्वयं रिपुसँगै बन्छौँ मलामी भने
खाई हुर्कन मात्र मानिस भई जन्मेर के सार छ ?
जन्मी केवल भोग खातिर जिए यो जन्म धिक्कार छ ।१।

गोर्खाली पहिचान जीवित हुने हुड्ङ्कारले होइन
पुर्खाको अमरत्व विक्रय गरौ चर्चीत्कार भर्ने किन ?
नाराले कुन देश टिक्छ ममता विश्वास फालेपछि ?
मालाको कुन अर्थ हुन्छ पहिल्यै घाँटी छिनालेपछि ।२।

झण्डा होइन राजनीतिक कुरो हो गर्वको त्राण यो
सीमा केवल साँध होइन महावीरत्वको प्राण हो
सीमा साँघुरिए ध्वजा झुकिरहे खोज्ने कहाँ गौरव ?
के मुर्दाघरभित्र रञ्जन दिने होला कुनै उत्सव ।३।

के दायित्व पदीय धर्म कुन हो जान्दै नजानेपछि
आफू उच्च पदस्थ ढोग्य हुनुमा संसार ठानेपछि
के स्वाधीन बनिन्छ भूमि लुटको अड्डा बनायौँ भने ?
जोगाइन्छ अनाज के सलहको जिम्मा लगायौँ भने ।४।

बस्तै छौँ यदि मूकदर्शक बनी आफ्नो ध्वजा होचिँदा
जिन्दावाद भजी खुला सडकमा उफ्रेर के फाइदा !
मुर्दावाद सरापको प्रलयले गल्दैन कोही पनि
के हात्ती भयभीत हुन्छ थपडी चुट्की सुसेली सुनी ।५।

०००
नुवाकोट