नेपाली हास्यव्यङ्ग्य अनलाइन पत्रिका

रामशरण न्यौपाने :

भ्रष्टाचार महारोग बन्यो नेपालमा ठुलो
ठुला भ्रष्टहरू लुक्ने सत्ताभित्र पर्‍यो दुलो ।
न्यायकर्मी बने मोटा न्याय दुब्लो भयो लुलो
आशले त्रासले पेल्दा बिग्रियो न्यायको तुलो ॥१

उजाडे खेतको बाली ज्यादा उन्मत्त हस्तीले
सानाको पेट काटिन्छ ठुलाको मोजमस्तीले।
यहाँ भण्डारको साँचो पेवा पार्छ अगस्तिले
बिग्रिए आज नेपाली भ्रष्टको नै प्रशस्तिले ॥२

पूजा सामन्तको गर्छन् युवाले गीत गाउँदै
राजनीति नशा लाग्यो उचाले मात ख्वाउँदै।
चाकडीमा खटेका छन् पसिना त्यो चुवाउँदै
भोका नाङ्गा बनाएर आफन्ती झन् रुवाउँदै ॥३

स्रोत साधन बेचिन्छन् मोल गुद्रुकको गरी
खाता विदेशका खाली महासामन्तका भरी।
छैन गरिबकोलागि भन्ने कोही कठैबरी!
बोकेर ऋणको भारी हिँड्छन् लोक मरीमरी ॥४

आशाको दीप बालेको निराशा फैलियो घरी
जनता देश झन् खायो डँढेलोले बनै सरी।
परिवर्तनले ल्यायो चोटमा चोट यस्तरी
विना श्रीपेचका राजा जन्माएर थरी थरी ॥५

०००
भक्तपुर