कलानिधि दाहालयो हो सङ्केत दुर्गति !!
कैकेयी डाहका नारी लक्ष्मण रीसका नर खोजी हेरौँ यिनै मात्र भेटिन्छन् घरका घर ! पाए मख्ख यिनै हुन्छन् गुमे आँसु चुहाउँछन् यिनै बास हुँदा नित्य धरालमई रुवाउँछन् !!
कलानिधि दाहाल :
उदास जिन्दगी हुन्न अनुदार पनि कतै
भ्रष्ट यो जिन्दगी हुन्न झूठखेत पनि कतै !
चम्चामा जिन्दगी हुन्न चोरमा हुन्न यो कतै
निस्कलङ्क खुला छ्याङ्ग हुने हुन्छ जताततै !!
जे हुनु पर्ने हो हुन्न नहुने हुन्छ हो तर
मूर्ति पूजनका ढ्याङ्ग्रा बजेका छन् सबै घर !
अन्धभक्त यता झुक्दै पाखण्ड पाउ चुम्दछन्
भ्रष्टाचारी उचालेर अग्ला यी ओठ घुम्दछन् !!
देशभक्त बनेका छन् चुलीमा ठगका हुने
चोर, गुण्डा, लफङ्गा छन् सत्ताका दिलमा छुने !
पापाचारी दुराचारी धाउँछन् पशुका पति
उल्टा दृश्य यिनै देख्दा मन पोल्दछ भत्भती !!
पण्डाहरू जपी माला टीका ललाटमा घसी
धर्मपाखण्डका खेती गर्दछन् घरमा बसी !
ब्वाँसाका देह उक्लन्छन् हरिया दिलमा छुन
लोभलम्पटका लास उफ्रन्छन् जिउँदा हुन !!
जहाँ संस्कारका नौला उभिन्नन् दीपका जग
उज्याला चेतना जन्मी बल्दैनन् बनी जग्मग !
मान्छे भौतिकका दास जङ्गली लास बन्दछन्
सर्वत्र गन्ध दुर्गन्ध मन खाडल चुन्दछन् !!
टपरे ताँत लागेर जहाँ तर्पण गर्दछन्
जलसिञ्चन दुर्गन्ध खाल्डामा सास फेर्दछन् !
राजनीति जहाँ हुन्न विचार आडको चुली
त्यस्ता समाजको झुण्ड कहाँ फेर्छ र काँचुली !!
न चुली चुली नै हुन्छ न हुन्छन् काँचुली कतै
चाक्षुसी दृश्य छन् खाल्डा खाल्डाबाहिर खै कतै !
भेडोझैँ खातमा खात लातको छ सिरान यो
जम्मै छन् जति छन् छाती परी चिरान हुन्छ यो !!
कैकेयी डाहका नारी लक्ष्मण रीसका नर
खोजी हेरौँ यिनै मात्र भेटिन्छन् घरका घर !
पाए मख्ख यिनै हुन्छन् गुमे आँसु चुहाउँछन्
यिनै बास हुँदा नित्य धरालमई रुवाउँछन् !!
पाऊँका आसले पाउ सर्ने मानिस साथमा
नगुमोस् रउँको टुक्रो भन्नेका गाथगाथमा !
म भए हुन्न मान्छे म ऊ भए पनि यो मति
मान्छे पटक्क क्वै यो हो सङ्केत दुर्गति !!
०००
कलेकुटी, काठमाडौं
Subscribe
Login
0 Comments
Oldest
