नेपाली हास्यव्यङ्ग्य अनलाइन पत्रिका

कृष्णप्रसाद पौडेल ‘जस्ताघरे’ :

युवा सारा हाम्रा विविध पिरले छन् विरहमा ।
जुनी धान्ने खाखा इलम नहुँदा छन् सकसमा ॥
नयाँ शिक्षा दीक्षा प्रगति पथका युक्ति पुरिए ।
हियो गाँठो पार्दै युवक युवती बाहिर गए ॥

व्यवस्था पल्टाई नव प्रकृतिका शासन चले ।
पुराना पन्छाई विविध छविका शासक भए ॥
यहाँ सत्ता भत्ता पद र धनका खेल रचिए ।
छली चाला बढ्दा युवक युवती बाहिर गए ॥

बिगारे भत्काए नियम र प्रथा सिर्जनहरू ।
बिलाए मिल्काए विधि चलनका अक्कलहरू ॥
यहाँ छक्का पन्जा सुरथ चिडका खेल रचिए ।
अहो! सुर्ता मान्दै युवक युवती बाहिर गए ॥

विकासे नाराले धुर विकटमा डोजर चले ।
कुना पाखा कान्ला भिर जमिन ती भत्किन पुगे ॥
बढ्यो बाढी पैह्रो गरिबजनका आलए बगे ।
कठै छाती पिट्दै युवक युवती बाहिर गए ॥

खनीखोस्री गर्ने प्रविधि सिपका आँट सकिए ।
करेसा बारीमा तनमन हुने जाँगर गए ॥
कुटो नाम्लो डोको घन र हँसिया गायब भए ।
हलो मेलो छोडी युवक युवती बाहिर गए ॥

नयाँ धन्दा थाल्ने अवसरहरू ध्वस्त गरिए ।
झुटो नारा मात्रै मन मगजमा टम्म भरिए ॥
सधैँ झालेमाले विष कपटका खेल रचिए ।
दशा पीडा बढ्दा युवक युवती बाहिर गए ॥

०००
वि.न.पा.-४, बट्टार, नुवाकोट ।
हालः का. म.न.पा.-१६, बालाजु, काठमाडौं ।