नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

च्यातियो लोकको तन्त्र, फालियो गणको कथा ।
हापियो सङ्घको वाद, भागवण्डा जतातता ॥
वण्डातन्त्र महामन्त्र, दलभित्र र बाहिर ।
विधान नीति सिद्धान्त, मिच्नमा सब माहिर ॥ १॥

भ्रातृ वा मातृ संस्था हुन्, शुभेच्छु सङ्घ हुन् जति ।
‘वण्डा —टीका’ लगाएर, मिच्छन् विधानको गति ॥
बन्डा पाएर ठन्डा छन्, एकतन्त्र रुचाउने ।
टन्टा लन्ठा सबै भाग्दा, हुन्छ झन्डा समाइने ॥ २॥

प्रजातन्त्र मजातन्त्र, वण्डातन्त्र सधैँ रहोस् ।
नेतातन्त्र महामन्त्र, लोकतन्त्र भनी कहोस् !!
पिछलग्गू महा धक्कू, चक्कूका हुल हुल्लड ।
नाता चाकर बोकेर, गनायो सङ्घको बल ॥ ३॥

मुखमा लोकको तन्त्र, मनमा एकतन्त्र छ ।
काममा स्वार्थको तन्त्र, वण्डातन्त्र त मन्त्र छ ॥
काले काले मिली भाले, खाले गाले बढे अति ।
सर्प बिच्छी मुसा मिल्दा , रोकियो राष्ट्रकै गति ॥ ४॥

प्रदेश संघका मान्य होलै मन्त्री बजाउने ।
सर्कार फेरिए धेरै, सबै बन्छन् गनाउने ॥
गाईजात्रा छ साँढेका लाखेजात्रा अहर्निश ।
वण्डातन्त्र महामन्त्र, विकास हुन्छ झिस्मिस ॥५॥

०००
धादिङ