नेपाली हास्यव्यङ्ग्य अनलाइन पत्रिका

हरिप्रसाद उप्रेती :

हो !
म खुम्चदैछु
प्रत्येक क्षण
म नैतिकतामा खुम्चदै छु
विचारमा खुम्चँदै छु
निरपेक्ष बन्दा त फराकिलो हुनु पर्ने
तर स्वार्थले बाँधेका पर्खाल भित्र खुम्चदैछु ॥

मेरो राष्ट्रियता खुम्चँदै छ
मेरी मातृभूमि खुम्चँदै छिन्
मेरो इज्जत खुम्चिसक्यो
हिंसा प्रतिहिंसाको डरले
मेरा बोलीहरू खुम्चँदैछन्
हेर्दाहेर्दै मेरा स्वतन्त्रता खुम्चँदैछन् ॥

विचारको क्षितिज नै खुम्चेपछि
भूगोल र इतिहास दुवै खुम्चिए
व्यवहार खुम्चिने नै भए
निष्पक्षता खुम्चिएको पटकौं भइसक्यो ॥

यो खुम्चाइले म डराइ सकेँ
सबै परिवेश खुम्चेको देखेर
खुम्चँदा खुम्चँदै एक दिन
म भन्दा पहिल्यै मेरो देश
मानचित्रबाट विलुप्त होला कि भनेर !!

०००
काठमाडौं