नेपाली हास्यव्यङ्ग्य अनलाइन पत्रिका

लक्ष्मण नेवटिया :

बुढेसकाल लागेपछि
सुध्रिनु पर्ने हो ताल,
मेरो टोलका बाजेको त
झन बिग्रेको चाल ।

भेट्दा अर्ती दिनुहुन्छ
जानु पर्छ देवालय
तर साँझ पर्दै कुनामा
खोज्नुहुन्छ मदिरालय ।

जहाँ जहिले भेट्नु हुन्छ
चिटिक्क नानी कुमारी
चिनजान नभए तापनि
गर्छन् भलाकुसारी ।

युवादेखि बिग्रेको बानी
छुटेन सौन्दर्यपानको,
तरुणीसँग हिमचिम गर्नु
अवसर शान सम्मानको ।

श्रीमतीलाई दिनुहुन्छ
चश्मा नदेख्ने परको
आफूचाहिँ लाउनुहुन्छ
गोल्डेन चश्मा पावरको ।

लुकाउनुहुन्छ कण्ठीमाला
प्रवृति रंगीन मिजाजको
यही मिजाजलाई भन्नु हुन्छ
स्वस्थताको राज हो ।

बढाइ चढाइ रंगीन कर्तुत
चिया पसलमा सुनाउनुहुन्छ
श्रीमतीलाई आएको देख्दा
टाउको तल लुकाउनुहुन्छ ।

प्रभुवर देऊ पाकालाई
विवेकसँगै विचार शुद्धि
लेख्दा,अन्तमा भन्नै पर्यो
“बुढेसकाले- विपरित बुद्धि”।

०००
विराटनगर