नेपाली हास्यव्यङ्ग्य अनलाइन पत्रिका

हेमराज पन्त :

कविता कविको बुझ भाव मियो ।
तरवार तिमी म बनेछु सियो ॥
कति वर्ष बिते कति पर्व बिते ।
जब दीन दुखी म चुसेर जिते ॥ १

मन सारथि हो तन यो भरिया ।
कति कष्ट बने कुसुमी हरिया ॥
दिलमा छ उमङ्ग,बहार थपी ।
म बसे किन खै कुरुवा नजपी ॥ २

अति कष्ट दियो रसपाब गरे ।
म भँडार बनी सब कष्ट भरे ॥
जलपान गरौँ नव बोतलको ।
पहिचान गरे तिमी हौ दलको ॥ ३

बस दानव बोतलको बलमा ।
पदवी छ निकै डलरे दलमा ॥
घरवारविहीन बनेर बसे ।
जब बोतलमा सब भाग्य खसे ॥ ४

न त इज्जतको प्रवाह कुनै ।
रस सोम मिले न छ चाह कुनै ॥
बस रक्त पिई मनमोज गरी ।
कति रात लुटेर सुते यसरी ॥ ५

झन चन्दन देख्छु निधार भरी ।
कति दाग, कलङ्क दलेर मरी ॥
अब पुज्नु छ सौच गरेर तिमी ।
कति भार सहेर रुँदै छ जिमी ॥ ६

०००
पाटन २ सिलङ्गा, बैतडी
हालः पहलमानपुर, कैलाली