नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

अनायास पारा अघोरी बनेका
हराएर आफै कता खै हिंडेका
मलामी लखेट्दै दुबै छन् मिलेका
कुलाचार बिर्से मुकुण्डो भिरेका।१

हजारी थिए जो करोडौं लुटेका
कुसंस्कार थाले हरामी जुटेका
दलाली रजाईँ छ थाक्रो र टेका
म खाऊँ म लाऊँ मदानी र ठेका।२

कुभिण्डो र फर्सी प्रसस्तै फलेका
घिरौंला र बोडी चिचिण्डो कुहेका
कतै मासदाना भकिम्लो र काँक्रा
उता राजखानी हसुर्दै गरेका।३

यता राजधानी फटाहा बसेका
जता कोल घानी छ चिल्लो घसेका
जसै घाम पानी र हावा जुटेका
भुके लाज मान्दै लुटेरा बिकेका।४

सुरा खान थाले लगाए घमेरा
यिनै धुन्धुकारी भगौडा चमेरा
सिनो सुँघ्न लागे निमेकी चमेरा
लियो वाध्यतामा छिमेकी दहेंरा।५

न आचार मान्ने सदाचार ढाल्ने
बिचारी कुरौटे समाचार बोल्ने
सिलौटो र लोरो पटक्कै नटेर्ने
फलाहार बोको घिचे बीस धार्ने।६

०००
नवलपुर