नेपाली हास्यव्यङ्ग्य अनलाइन पत्रिका

तेजविलास :

एकचोटि
आँउछ भूकम्प
तथापि
गइरहन्छ पटक-पटक
धेरै पटक
पराकम्पन ।

शायद
त्यस्तै हो कि !
मनको तहमा
ज्ञानको यात्रामा
भूकम्प विनानै
आइरहन्छ
पराकम्पनहरू
कहिले
धर्मका नाममा
कहिले
मानव अधिकारको नाममा
कहिले
सत्ताका नाममा
कहिले
प्रतिपक्षका नाममा ।

अधकल्चो ज्ञान
सहनै सक्दैन
लुटमा लुटपुरिएको धर्म
पैसाले बोलेको मानवाधिकार
उन्मादले उत्ताउलिएको सत्ता
निराशाले निसासिएको प्रतिपक्ष
त्यसैले त
मनको पराकम्प हटाउन
ज्ञानको पराकम्प बिर्सन
फाल्न चाहन्छु नवीन सोच
च्यातचुत पार्न चाहन्छु ग्रन्थहरू
अन्धवेगमाको यात्रा
हुने रहेछ आनन्द लाग्दो
न लाज, न घिन
मजा दिने रहेन छ
सिर्जनाले
के नै पो दिने रहेछ र !
पठनले ।
अवलोकन पो के गर्न छ र !
हिजो आज
गालीको सुतीखेती गर्न
चाहिने रहेन छ कुनै प्रमाण ।

०००
इच्छाकामना- ३, चितवन ।