नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´:

अैाधी मानिस छन् यहाँ नगरमा, आफैँ बडा बन्दछु ।
अग्ला ठालु नसालु धूर्त नरका, आदेशले चल्दछु ।।
जग्गाकाण्ड अनेक भ्रष्टपनका, कैयौँ कथा रच्छु म ।
बाठा नायकसाथ बस्छु जहिल्यै, त्यो गाउँमा जान्न म ।।-१

डाँका तस्कर भाटका कपटका, मान्छे चुनी रम्दछु ।
किल्ला दुर्ग र धामका मुलुकका, सोझा सबै ठग्दछु ।।
आयो याम चुनावको यदि भने, दादा लिई डुल्छु म ।
सस्ता भोट किनेर पुग्छु पदमा, त्यो गाउँमा जान्न म ।।-२

सौदाका अनुदानका रकमका, भन्डारमा नाच्दछु ।
जिल्ला ग्राम प्रदेशमा विकटमा, चारो छरी हिँड्दछु ।।
चर्का भाषणले सभा सदनमा, नारा उराल्दै छु म ।
यस्तै चाल कुचाल रच्दछु म ता, त्यो गाउँमा जान्न म ।।-३

झुप्पो अङ्गुर हातमा छ रसिलो, आफैँ बनेँ लङ्गुर ।
लाँदै लान्न म गाउँमा विकटमा, खाँदै बनेँ बङ्गुर ।।
जिम्मा भाग विकास दूर जगको, पाएर मक्खै छु म ।
पाखा लेक मधेस बिर्सन पुगेँ, त्यो गाउँमा जान्न म ।।-४

खाई अङ्गुर शीघ्र निस्कन गयो, फोहोरको डङ्गुर ।
त्यही डङ्गुरमा सुतेँ म अगुवा, बन्दै गएँ भङ्गुर ।
धारे हात लगाउने नरहरू, खोजेर कुट्दै छु म ।
सत्ता शासनमा म गर्छु झगडा, त्यो गाउँमा जान्न म ।।-५

साटासाट गरी रमे महलका, श्रीमान वा श्रीमती ।
खाँचो टार्न उदात्त छन् रहरका, सञ्जालका दम्पती ।।
भ्रष्टाचार र अन्धकार थलमा, रोपेर गोड्दै छु म ।
यस्तो सूत्र छ व्याप्त यो सहरमा, भो गाउँमा जान्न म ।।-६

खाली पैदलले अहो ! म पहिले, चढ्थेँ सयौँ टाकुरा ।
घ्याम्पे पेट लिएर हिँड्छु अहिले, सुर्काउँदै पाखुरा ।।
तारे होटल धाउँदै गजबले, मैयाँ लिई बस्छु म ।
साँच्चै खास मजा छ कान्तिपुरमा, त्यो गाउँमा जान्न म ।।-७

०००
बट्टार, नुवाकोट । हाल: बालाजु, काठमाडौँ ।
मोबाइल नं. ९८४१७५८१८४