नेपाली हास्यव्यङ्ग्य अनलाइन पत्रिका

रमेश खकुरेल :

संसारको चक्कर खूब लायौ
जहाँ गयौ स्वाद नवीन पायौ
यहाँ नयाँ चीज छ पाठ घोक
नेपालमा छौ अब नाक छोप ।।

गर्छौ जसो लाज यहाँ हुँदैन
भन्दैन कोही र भने छुँदैन
अरू कुरा छोप कि वा नछोप
धुलो निकै ऊड्दछ नाक छोप ।।

घरैपिछे मन्दिर देवता छन्
कुनै यता छन् त कुनै उता छन्
पीरो धुवाँ लाग्छ भनिन्छ धूप
रुवाउला है अब नाक छोप ।।

म मै हुँ भन्दै कति वीर आए
यता समाए र उता कमाए
नाकै कटाए तर लुक्छ खोट
यस्तै गरौला अब नाक छोप ।।

राम्रै गरेमा पनि दोष हाले
फुटाउँदै सालिक मूर्ति ढाले
यस्तै परौला पछि आज सोच
बचोस् न यो नाक त नाक छोप ।।

जता गयो गन्धपुरी उतै छ
गल्लीपिछे फोहर गम्कँदै छ
कीटाणु छन् गर्नु छ रोकटोक
उपाय यौटै अब नाक छोप ।।

०००
कमलपाेखरी, काठमाडाैं