नेपाली हास्यव्यङ्ग्य अनलाइन पत्रिका

सुरेश भट्ट :

जाँतोलाई भन्दा पनि हातोलाई कति साह्रो हतारो
मान्छेको भिडमा पसेर पनि कुकुरको चुनावी चटारो ?।

लिङ्गे गाडेकै छैन पिङ खेल्न हतारो समाति हाल्यो लठारो
पोथीले फुल पारेकै छैन भालेलाई ओथारो बस्ने हतारो ।

कुरोको चुरो बुझ्नखोज्यो के भनिस् ? भनेर समात्यो कठालो
नेपालमा सत्ता टिकाऊन हाम्रा नेताहरू विदेशमा पथारो ।

कैलेसम्म बन्छौ नेता हो छिमेकीको स्वार्थ सिद्ध गर्ने झटारो ?
एकदिन खुल्नेछ नेताजी तिम्रा काला कर्तुतको कालो पेटारो ।

लोकतान्त्रिक गणतन्त्र ल्याएको नेपालीले हैन ? बन्न तिम्रा कमारो
बटुलेर रमायौ हैन नेता ? माफिया भ्रष्टाचारीको खँदारो ?।

के सरकार चलाउँछौ खोई कबाडीले ! मर्मत नगरेको खटारो ?
अब त कोरोनाले मरे नि अरु व्यथा पिरले मरे नि भइयो पोजेटिभ भटारो ।

जति चुटे नि नउठ्ने गाले गोरू शेरामा हाले जस्तो चाम्रो माटो नेताको कन्पारो
अझै समय छ राष्ट्र निर्माणका लागि दृढ ईच्छा शक्ति लिई सपारो ।

०००
काठमाडौं, हाल अमेरिका