नेपाली हास्यव्यङ्ग्य अनलाइन पत्रिका

रमेश खकुरेल :

गएँ हेर्न यौटा मजाको तमासा
म गर्दैछु साथी त्यसैको खुलासा
भनूँ के गरी भन्नुझैँ भैरहेछ
नबोलूँ भने पेटमा कुत्कुती छ ॥१

नहाँसूँ भन्यो मौन बस्नै नसक्ने
यसो मुस्कुराएर कामै नचल्ने
खुली अट्टमा हट्ट हाँसो बगेछ
धुलो काउसो ली छरेझैँ भएछ ॥२

जमेको थियो हाट मान्छेहरूको
थिए हेर्न मान्छे म खोजूँ अरू को
कुनैको थियो टाउकामाथि फर्सी
कुनै गोरुजस्तै थिए मस्त जर्सी ॥३

मजाको कुरो ती सबै मिश्र देखेँ
कुनै पाँचखुट्टे कि झैँ चित्र देखेँ
भनूँ शब्द चाहिन्छ डोका कि डोका
परेवा न कौवा न घोडा न बोका ॥४

०००
काठमाडौं