नेपाली हास्यव्यङ्ग्य अनलाइन पत्रिका

टङ्कराज ढकाल तितेपाती :

महत्वाकाङ्क्षाले दुःख ल्यायो वितण्डा
वितण्डाले गर्दा रुन्छ आफ्नै छ फण्डा
र फण्डा जाग्नाले बढ्न जाँदैछ तृष्णा
वितृष्णा औतारी हुन्छ चिन्ता छ कृष्णा।१

हतौडा अकाङ्क्षा चोट देला फफर्को
फफर्को चल्नाले द्वेष आक्रोष चर्को
छ चर्को औडाहा अन्ध बन्ला ततर्को
ततर्कोले भारी बोक्छ चिन्ता छ लर्को।२

छ पैसाको भोको चिन्न माटो नसक्दा
नसक्ने जो मान्छे लाग्छ बाटो नजोख्दा
नजोख्ने चौपट्टै उर्ध्वगामी छ योध्दा
छ योध्दा ज्यालाको एक चिन्ता नबुझ्दा।३

उज्यालो खोज्नेले जान्नु पर्ने कुरामा
कुरामा अल्झिन्छन् झुम्म पार्ने सुरामा
सुरामा पौडिन्छन् हात लाग्यो छुरामा
छुरामा के होला पर्छ चिन्ता छ आमा।४

पढ्यो के शिक्षा खै नामधारी उधारो
उधारो दीक्षाले धुन्धुकारी हतारो
हतारोमा फस्दा बन्द पायो तगारो
तगारोमा कुर्दा बाँच्न चिन्ता छ साह्रो।५

पसारोमा पर्ने उर्ध्वगामी छु भन्दै
नभन्दै चिन्ताको राजखानी हसुर्दै
हसुर्ने खानेको चालबाजी नचल्दा
नचल्ने खोटाको मोह चर्को छ चिन्ता।६

कुरेका दोबाटो हन्तकाली भिखारी
भिखारी दाताको काम लिन्छन् शिकारी
शिकारी पारामा दुष्ट फस्छन् डकारी
डकार्ने चिन्ताले भ्रष्ट बन्छन् चकारी।७

०००
नवलपुर