नेपाली हास्यव्यङ्ग्य अनलाइन पत्रिका

नवराज कार्की :

ठूनो काठको टुक्रा सानो
गिंड हो यो, अचानो !
खाँदा खाँदा चोट अनेकौँ
भैसक्यो यो पुरानो
कहिलेदेखि लडिरहेछ
घरको एक कुनामा
चुपचाप त्यसै, विना मेसै
परिरहेछ उत्तानो !

छाती माथि उफ्रिरहन्छ
खुकुरी धार सहित
तर प्रहार, सहिरहन्छ
गर्दैन ऊ, चानुमानो
लत्पत् रगत छ, यसैमाथि
कहिल्यै छैन, ओभानो !

उही काठको पिर्का बन्यो
उही काठको कुर्सी !
उही काठ हो, दाउरा हुने
उही काठको, अचानो !
काट्ने खुकुरी ठूलो हो कि ?
ठूलो हो यो, अचानो !

गर्नै बाँकी छ, छलफल अझै
हुनै बाँकी छ, छिनोफानो !

०००
नोभेम्बर २४, २०२४
अमेरिका