नेपाली हास्यव्यङ्ग्य अनलाइन पत्रिका

गायत्री परिरोशनी :

एक छाक मकैको
च्याँख्ला खाँदा,
पचाउँन नसकि
पाँच पटक पाइखाना
पस्नेहरूले,

एक गिलास खाटी
गाईको दुःध पिउँदा,
डायरीयाले थला
पर्नेहरूले,
विषादी नराखेको
अर्गानिक खानेकुरा खाँदा
अपच भएर हैजा
हुनेहरूले,

आफ्नो घरमा आगो लाग्दा
थपडी मारेर,
पराइकोमा सलाई कोर्दा
डाँको छोडेर
रुनेहरूले,

फाइदाको आची
हातैले चाटी,
ठेला उठेको हातलाई
छिछी र दूरदूर गर्दै
दीनदुःखीहरूलाई ज्यूँदै मारी,
आफूहरू ज्यूँदो लाश भएर सधैँ
बाँच्नेहरूले,

आफ्नो घरभित्र लामखुट्टे पस्दा
थुरथुर काम्दै,
अरुका मुद्दाहरूमा
अर्ति–उपदेशले
सगरमाथा
छुनेहरूले,

सित्तैमा चुस्न पाए
पराइ समेत आफ्नो जस्तै,
केही नपाएमा,
आफ्नो समेत पराइजस्तो
मान्नेहरूले,

प्रगति गर्दा खुट्टा तान्ने,
दुःख पर्दा लात्ताले
हान्नेहरूले ।
पाचन प्रणाली र मष्तिस्क
जति कमजोर हुँदा समेत
सजिलै देशलाई टोक्न
सक्नेहरूले,

जे–जे भन्छन्,
जे–जे माग्छन्,
तथास्तु भन्दै
कौडीको भाउमा
अमूल्य मतदान गर्नेहरूलाई
के भनौँ र खै ?
कुरोको जुरो हेर्नेहरूलाई ।
सस्तिएको बेला
भान्छामा तिहुन् फेरे जस्तै
मज्जाले सरकार फेर्नेहरूलाई ।

०००
स्याङ्जा