नेपाली हास्यव्यङ्ग्य अनलाइन पत्रिका

कालीप्रसाद रिजाल :

नोटले भरिएको ब्रिफकेस
थन्काउन भनेर जाँदा
आफ्नो आलेशान हवेलीको
इटालियन मार्वलमा चिप्लिएर
एक जना महान् नेताको
प्राणपखेरु गयो
राष्ट्रका लागि
अपूरणीय क्षति भयो !

त्यागी तपस्वी नेता
अत्यन्त परोपकारी थिए
त्यसैले मरेपछि पनि परसेवा गर्ने
उनले सङ्कल्प लिए
आफ्नो लासलाई टुक्रा टुक्रा पारेर
पशुपक्षीलाई ख्वाइदिनू भनेर
उनले इच्छापत्र गरिदिए

नेताको इच्छाअनुसार
झण्डा ओढाइएको उनको पार्थिव शरीरलाई
टुक्रा टुक्रा पारियो
र पशुपक्षीका लागि चउरमा
चारैतिर फालियो

तर कस्तो आश्चर्य !
कोही नजिकसम्म आएनन्
कुनै गिद्ध कुकुर कुनै स्यालले
त्यसलाई खाएनन्

मैले कौतूहलतावश
रहस्य जान्न खोजें
र नजिकै रूखमा बसेको
गिद्धराजलाई सोधेँ-
किन गिद्धराज
नेताजीको मासु किन नखाएको ?
कि आज अन्यत्रै बफे खाएर
टन्न अघाएको ?

गिद्धराजले मेरो प्रश्नलाई
गम्भीर रूपमा लिए
र मुख बिगारेर जवाफ दिए-
हेर्नुस् हामी मरेकाको सिनो खान्छौँ
हामीलाई मीठो लाग्छ
त्यसप्रति तृष्णा पनि जाग्छ
तर बाँचेकै बेला डुङडुङती
गन्हाइसकेको मान्छे त
हामीलाई पनि दिगमिग लाग्छ !
हामीलाई पनि दिगधमिग लाग्छ !!

०००
आफैँलाई हराएपछि (२०६१)