काशीनाथ मिश्रितदेखाउने दाँत
बन्छन् ऐन छ चैन मेच सबमा लाग्दैन क्यै कानुन केही छैन उपाय ती सुकुलमा भाग्दैन त्यै कानुन यौटा दाँत चपाउने छ र अझै अर्को छ देखाउने भाँच्नै पर्छ चपाउने, रहिरहोस् त्यै मात्र देखाउने ।
काशीनाथ मिश्रित :
भ्रष्टाचार बढेर व्यापक भयो भन्छन् सबैले तर
जो हो चोर ठुलो छ सोर उसकै के पो भएको छ र ?
भ्रष्टाचार भयो भनेर जसले भन्छन् उनै गर्दछन्
ख्वाई घूस जता छ लुट्न सरुवा गर्छन् त्यतै सर्दछन् ।
न्यायाधीश भएर घूस सजिलै खान्छन् अरूको कुरा
के गर्नू बिचरा निरीह मुखिया भेटुन् कहाँ आँकुरा !
बाटो पूल बनाउने सब यहाँ खान्छन् गिटीबालुवा
ज्यामीले श्रम बेच्नसम्म नसकी बन्छन् घरैपालुवा ।
उम्कन्छन् कतिले करोड रुपियाँ चोरी लुकाए पनि
पक्रिन्छन् कति भोक मेट्न कनिका काँचै बुकाए पनि
निस्फिक्रीसँग हिँड्दछन् दशगजा भन्सार ठग्ने पनि
भिर्छन् वस्त्र त गेरुवा नि मठमा ती मूर्ति लग्ने पनि ।
कुर्नै मासु त स्याल वा कुकुरको जत्था पठाए जहाँ
काढी र्याल कठै बसुन् र बिचरा खाई अघाए त्यहाँ
के भो हेर्न भनेर गिद्ध सबका टोली त्यहाँ पुग्दछन्
मोटा मात्र थिए सबै कुकुर ती बेजोडले भुक्दछन् ।
मन्त्री क्वाटर पो सजाउन यहाँ बन्छन् सयौँ योजना
खाने अन्न नपाइ भोकमरिले मर्छन् हजारौँ जना
जन्ताको रखवार गर्न जसले जिम्मा लिई बस्तछ
के पो लाग्छ र सुस्त सुस्त उसले घाँटी स्वयं कस्दछ ।
डामाडोल छ अर्थतन्त्र अहिले खस्केर पैह्रो गयो
माछा मार्न असाध्य औसर पर्यो पानी त मैलो भयो
जेटै खान सके बजेट त निकै सानो कुरा भैसक्यो
कत्रो पेट रहेछ भेट नहुने हेर्ने सदिच्छा थियो ।
बन्छन् ऐन छ चैन मेच सबमा लाग्दैन क्यै कानुन
केही छैन उपाय ती सुकुलमा भाग्दैन त्यै कानुन
यौटा दाँत चपाउने छ र अझै अर्को छ देखाउने
भाँच्नै पर्छ चपाउने, रहिरहोस् त्यै मात्र देखाउने ।
भ्रष्टाचार छ नौनितुल्य दधिमा त्यो मथ्नु ऐले पर्यो
खै कल्ले किन हो र फेरि कहिले ठेकी मदानी हर्यो !
सुन्दै छौँ अझ अख्तीयार छ कता ? न्वारान कल्ले गर्यो ?
मेट्नै पर्छ कुनाम त्यो कपटको ज्यादै समस्या पर्यो ।
०००
२०६२/०१/२८
२०८१ चैत २८ गते लाेकार्पित ‘मिश्रित तरङ्ग’ कवितासङ्ग्रहबाट
Subscribe
Login
0 Comments
Oldest
