नेपाली हास्यव्यङ्ग्य अनलाइन पत्रिका

हरि काेर्काली :

भनिन्छ मानिस
पृथिवीको शृङ्गार हो
विश्व वाटिकामा फुलेको सुन्दर फुल हो
ब्रह्माण्डकै शोभा हो
विधाताले आफै बस्न भनी बनाएको
सुरम्य मन्दिर हो ।

हो पनि
आध्यात्मिक छउन्जेल मानिस सबै सबै हो
तर, आधुनिकताका नाममा
अध्यात्मबाट टाढिदै टाढिदै
जे गर्दा पनि आफैलाई
केन्द्रमा राख्न थालेपछि
ऊ आफै पनि विग्रि रहेछ
अरूलाई पनि विगारि रहेछ ।

उसले
हावा, पानी र माटो विगारि रहेछ
हिमाल, पहाड र मैदान बिगारि रहेछ
जङ्गल, प्रकृति र संस्कृति विगारि रहेछ
ऋक्ष, अन्तरिक्ष सबैको मङ्गल भत्काइ रहेछ।

केही बनाउने निहुँमा
केही बचाउने निहुँमा
केही खोज्ने र केही पाउने निहुँमा
भेटे जति सबै र
छोए जति सबै विगारि रहेछ
र आफैँ सङ्कटमा परि रहेछ ।

अब पनि यो मन्द प्रवृत्ति कायमै रहे
एक दिन ऊ आफै विनष्ट हुन सक्छ ।

०००
भक्तपुर