नेपाली हास्यव्यङ्ग्य अनलाइन पत्रिका

डा. शरद परासर मरहट्टा :

कस्ले भन्यो ? केले तान्यो ? फेरिएछ मन,
धेरैपछि पिताजीको देखेँ कडापन।
चर्को डाँको गरिकन थाल्नुभयो भन्न,
“किन बस्छस् अमेरिका? आइज झोले बन्न !”

पण्डित्याईं किन छाँट्नु ? पुग्यो लेख्न, पढ्न,
अगुवाको नजरमा किन पर्यो सड्न ?
विद्यालय नदेखेका ‘बुद्ध’ हेरे हुन्न ?
किन बस्छस् अमेरिका ? आइज झोले बन्न !

जिम्मेवारी किन लिन्छस् ? किन सास्ती बोक्छस् ?
समयको बहावलाई कहिलेसम्म रोक्छस् ?
बोके झोला यतै पनि कमाइन्छ टन्न,
किन बस्छस् अमेरिका ? आइज झोले बन्न !

लछार् पाटो के नै ल्यायो तेरो विज्ञानले ?
खोजी पसे के भन्दैन वेद–पुराणले ?
भाषणमा ताली ठोक्दै झोला बोके हुन्न !
किन बस्छस् अमेरिका ? आइज झोले बन्न !

मुनिदेव सीमा छेउ अल्मलिँदै थिए,
देश छिरे, ‘कपिल’ले झोला जिम्मा लिए।
‘राम’ आए ठोरी हुँदै, तैँले आउन हुन्न ?
किन बस्छस् अमेरिका ? आइज झोले बन्न !

०००
नर्थ क्यारोलिना, अमेरिका
(जुन २०, २०२५)