नेपाली हास्यव्यङ्ग्य अनलाइन पत्रिका

हरि काेर्काली :

ग्यास खोज्न जाऊँ कि
सरकार खोज्न जाऊँ
एउटा खोज्दा अर्को छुट्छ
कहाँ होला दुवै भेटिने ठाउँ ?

बजार कालो छ
केही देखिंदैन
सरकार वेपत्ता छ
कतै भेटिंदैन
बजार देख्न नपाइने
सरकार खोज्दा नभेटिने
ओहो !
कस्तो पो भयो यो ठाउँ !
के हो यो अवस्थाको नाउँ ?

ठूलाठालुले नतिरे पनि
तिर्नुपर्ने कर तिरेको तिरेकै छु
ऐन-नियमको पालना पनि
गरेको गरेकै छु
किन गन्दैन सरकार निमुखालाई ?

किन आउँदैन सरकार देखिने गरी ?
किन वस्तैन सरकार भेटिने गरी ?
के सरकार पनि भूमिगत हुन्छ ?
कि सरकार बुर्का ओढेर हिँड्छ ?
कि सरकारले हार्यो भनेर मानौं ?
कि सरकारलाई
माफियाले तान्यो भनेर ठानौँ ?

अब त सरकार
गाउँगाउँमै आउँछ भन्थे
जहाँ खोज्यो त्यहीं पाइन्छ भन्थे
गाउँमा त भ्रष्टाचार मात्रै आएको छ
र सबैलाई रुवाएको छ !

कसले रोकिरहेछ सरकारलाई
थुनेर सिंहदरबारमा ?
कुन दारुकले हाँकिरहेछ रथ भ्रष्टाचारको
निस्फिक्री/मस्तीले गाउँघरमा ?

०००
धृतराष्ट्रकाे शुभकामना (२०७९)