नेपाली हास्यव्यङ्ग्य अनलाइन पत्रिका

बद्रीप्रसाद दाहाल :

उम्रेको भित्रदेखि, पदपद मनको तिर्सनाको उपर्ना ।
पिप्पल्का पात जस्ता, यरि-थरि अगुवा मोजमस्ती हसुर्न ॥
घस्दै धेरै खरानी, कमर-जघनमा क्रान्तिकारी अनौठा ।
देख्दै ईर्ष्या र निन्दा कति कति थपिने, राजनेता गनौटा ॥१॥

जस्का सिद्धान्त मर्छन्, डलर घुस लिँदै, सातपुस्ता सपारी ।
छाते, हुक्के र ढोके अगल-बगल नै पूर्ण-संसार ठानी ॥
बिर्सी योद्धा सबैको, रगत फगत भै, भाँडभैलो अचाक्ली ।
दुर्भाग्यस्तम्भ जस्तै बहुदल छल भो, भ्रष्ट-स्वार्थी सँगाली ॥२॥

सत्ता आँधी हुरीको, विकृति रीतिसँगै खालि हल्ला र नारा ।
आफू आफ्ना कुलैमा, सीमित सब भए स्वार्थी यी देशमारा ॥
ठाडै गर्दैछ चर्को दमन गन सरी, न्याय रोईरहेछ ।
नेता मस्तिष्क कोपी, बहुदल यसरी आज दोईरहेछ ॥३॥

जस्मा छन् घूस खानी, कमिसन दलको नाममा पूँजीवाद ।
जस्मा सामन्ती चल्ला घुरी-घुरी दिनहुँ गर्दछन् रे विवाद ॥
उस्तै मस्तिष्क बोकी, कभर फरकमा ‘भूत’ बन्छन् उदार ।
आफ्नो अस्तित्व बेची जसरी-तसरी नै मन्त्री बन्नै हतार ॥४॥

०००
धादिङ