नेपाली हास्यव्यङ्ग्य अनलाइन पत्रिका

नरेन्द्रराज पाैडेल :

सेर्पा साबुन लौ आयो पूजा साबुन लिन्छ को
दशवटा खोलले यौटा सित्तैंमा पाइन्छ रे नि त्यो
बाम दक्षिण लौ आयो छाँट्दै सिद्धान्तको दुना
खैरा नोट बुझी भत्ता रमाएर पस्यो कुना ।

लो आयो परजा तन्त्र कुर्सी छेउ न जाऊ क्वै
नेतामा कुर्सीको मात तीव्र बन्दै छ रे अझै
पारो छिनछिन चढ्दैछ सत्ता मोह र मादको
अनाथ टुहुरा तिम्रो अब गर्दछ याद को ?

हिजोका बाघ हौ भन्ने लुकाईकन पुच्छर
दायाँबायाँ लुकी झिक्छन् स्याल हुइँया बरोबर
हिजोका स्याल गर्जिन्छन् छाला ओढेर बाघको
खल्खली पसिना काढी जाडोमा पनि माघको ।

नाङ्गो नाच चलेकै छ तस्करी र अभावको
छिनाझप्टी सिनोमा छ स्याल गिद्ध र कागको
चारो कसरी भेटौला, बिचरा जनता चरी
होस राखे नि बाच्छा हो साँढे गर्दैछ मनपरी ।

भोका उडुसको ताँती छाती ठोकेर लौ पस्यो
मुख मिठ्याउँदै आफैँ भान्छा गर्न भनी बस्यो
रसदार मिठो पेडा चाख्ता चाख्तै कठैबरा
बिर्सने रोग लागेछ जनताका सबै कुरा ।

के त्यो सलहको ताँती अनिकाल लिई पस्यो
के त्यो प्रगतिको यन्त्र खिया लागि थला बस्यो
श्रम, सीप, इमानदारी मास्ने गाँजा फुलेछ कि ?
सक्नेले मनपरी गर्ने कुनै मेला खुलेछ कि ?

०००
मुस्कान (कार्तिक-मंसिर २०५१)
हास्यव्यङ्ग्यकार नालीबेली (२०८२)