नेपाली हास्यव्यङ्ग्य अनलाइन पत्रिका

रमेश खकुरेल :

छिप्पिएपछि काँक्राको अचार पनि भो अब
भ्रष्टाचार गरे ठूलो शिष्टाचार भयो अब ।।

शिष्टाचार त्यही हुन्छ शिष्टले जुन गर्दछन्
फोहरी भ्रष्ट आचार शिष्टले किन गर्दछन् ।।

जस्तै ठूलो रहोस् भारी धेरैले बोक्न सक्तछन्
बाँडी चुँडी खाइएमा जे खाए पनि पच्तछन् ।।

इन्द्रले ब्रह्महत्याको पाप सारे अरूतिर
यौटा यज्ञ गरे पुग्छ भन्छन् शास्त्रधुरन्धर ।।

यज्ञका रूप फेरिन्छन् युगका अनुसारले
पञ्चामृत सुरा बन्छन् व्यवस्था अनुसारले ।।

दक्षिणाका रूप हुन्छन् देवता अनुसारका
गाडी डलर वा स्वर्ण वा घडेरी प्रकारका ।।

गरौं शिष्टाचार गरौं घरमा धनले भरौं
सात पुस्ता खान पुग्ने गरी अलिकता चरौं ।।

०००
कमलपाेखरी, काठमाडाैं